भर्खरै सम्पन्न एनआरएनए अमेरिकाको निर्वाचनबाट निवार्चित बरिष्ठ उपाध्यक्ष कृष्ण जिवी पन्थले आफुलाई निर्वाचित गराउने अमेरिकाबासी नेपाली समुदायलाई धन्यवाद दिंदै मातृभूमि नेपाललाई समेत स्मरण गरेका छन् । नव निर्वाचित एनसीसी बरिष्ठ उपाध्यक्ष पन्थले बिज्ञप्ती जारी गर्दै निर्वाचन सफल र आफुलाई बिजयी बनाउन सहयोग पुर्याउने अमेरिकाबासी समुदाय, संचारकर्मी, सामाजिक अभियन्ताप्रति कृतज्ञता व्यक्त गरेका हुन् ।
आप्राबासी नेपालीहरुको साझा संस्था गैह्र आवासीय नेपाली संघ, राष्ट्रीय समन्वय परिषद अमेरिकाको (सन् २०२१–२०२३) कार्यकालको लागी गत शनिबार र आईतबार सम्पन्न निर्वाचनमा पन्थ ६ हजार ८ सय ५० मत सहित एनसीसी अमेरिकाको वरिष्ठ उपाध्यक्षमा बिजयी भएका हुन् ।
आफु निर्वाचित भए लगत्तै नव निर्वाचित पन्थद्वारा सार्वजनिक बिज्ञप्तीमा निर्वाचनमा सकृयता पुर्वक मतदान प्रकृयामा सहभागी भई यस अभियानलाई एक कदम अघि बढाउने महान् कार्यमा संलग्न भएका तथा सहयोग पुर्याएकाहरु प्रति हार्दिकता पूर्वक धन्यवाद तथा आभार प्रकट गरिएको छ ।
विज्ञप्तीको पूर्ण पाठ
आदरणीय अमेरिकाबासी नेपाली आमाबुवा, दिदीबहिनी, दाजुभाई तथा सम्पुर्ण पत्रकार मित्रहरु, तपाईहरु सबैमा हार्दिक नमस्कारको अभिबादन ब्यक्त गर्दछु। हामी आप्रबासी नेपालीहरुको साझा संस्था गैह्र आवासीय नेपाली संघ, राष्ट्रीय समन्वय परिषद अमेरिकाको (सन् २०२१-२०२३) कार्यकालको लागी गत शनिबार र आईतबार सम्पन्न निर्वाचनमा तपाईहरु सकृयता पुर्वक मतदान प्रकृया सहभागी भई यो अभियानलाई एक कदम अघि बढाउने महान् कार्यमा संलग्न हुनु भएकोमा हार्दिक धन्यवाद तथा आभार प्रकट गर्दछु।
लोकतान्त्रिक प्रणालीमा निर्वाचनको माध्यमबाट नयॉं नेतृत्व चयन हुने सामान्य कुरा नै हो। यस यात्रामा भागलिई सकेपछि ब्यक्तिगत हिसाबले कसैको हारजित हुनु स्वभाबिक बिषय हो। तर, बिधी, पद्धति र प्रकृयाले हार्नु हुदैन, भन्ने मेरो अटल बिश्वास हो। यो यात्राको दौडको क्रममा म पनी सम्पूर्ण अभियन्ताज्यूहरु जस्तै मैदान उत्रिएको थिए। बिगतमा मैले शुरुवात गरेको केहि अधुरा कामहरुलाई मुर्तरुप दिई अमेरिकामा हाम्रो यो अभियानलाई एक अर्को उचाईमा पुर्याउने गहन आशाका साथ तपाईहरुले मलाई सुम्पिनु भएको जिम्मेवारीका प्रति म पुर्णत नतमष्तक छु।
निर्वाचन प्रकृयामा उम्मेदवार बन्नु भई बिजयी हुनुहुने मित्रहरु र उप बिजेता सबै मित्रहरुलाई एकमुष्ठ बधाई भन्न चाहान्छु। एउटै छाताको ओत भित्र समाहित एकै परिवारका सदस्यहरुको बिच सम्पन्न भएको यो निर्वाचनमा न कसैको हार भएको छ, न त कसैको जित नै। परिवारका सदस्यहरुको बिच सुमधुर प्रतिस्पर्धा भई आपसी सद्भाव र एकतालाई अक्षुण राख्दै सबैले अभियानलाई साथ दिंदा सिंगो नेपाली समुदायको जित भएको आभाष र महशुष गरेको छु। भोली भविष्यमा हामी आप्राबासी नेपालीहरुको सामुहिक समस्याहरु र यात्राको दौडानमा आईपर्ने अल्झनहरुलाई समाधान गर्दै अगाडी जाने क्रममा हामी सबैको समान दायित्व हुने नै छ।
आपसी मेलमिलाप, सहकार्य र सहमतिकै आधारमा नेपाली समाज अमेरिकालाई गति दिनेमा हामी सबै एकजुट बनौ भन्ने बिश्वास राख्दछु। अन्तमा, हामी अमेरिका र संसारभर छरिएर बसोबास गरेका नेपालीहरु साथै हाम्रो पहल र कोशिशमा बिश्व समुदायलाई आकर्षित गर्दै कोरोना कहरबाट बिछिप्त हुदै आक्रान्त भएको तपाई मेरो मातृभूमी नेपाल र आम नेपालीहरुको स्वास्थ्य उपचारको क्षेत्रमा आजै देखि केन्द्रीत हुन म यसै बिज्ञप्ती मार्फत हार्दिक अनुरोध गर्दछु।
तपाईहरुको,कृष्णजीबी पन्थनव निर्वाचित बरिष्ठ उपाध्यक्षगैह्र आवासीय नेपाली संघ, राष्ट्रीय समन्वय परिषद अमेरिका।
